Gedicht op de tweehonderdvijftigste dies van de Leidse universiteit. (1825)
In: Carmina festiva auctoribus Simone Speyert van de Eyk et Matthia Siegenbeek. Lugduni Batavorum, Apud S. et J. Luchtmans, Academiae Typographos, MDCCCXXV. UBL 4° Port. 14 : 5, p. 13-14.
IN NATALEM DUCENTESIMUM QUINQUAGESIMUM ACADEMIAE LUGDUNO-BATAVAE.
Descende, Musa, et dic mihi carmina
Festo in Minervae, qualia barbitos
Vatis Calabri, vel Quirini,
Vel Jovis in decus edidit, te
Pectus movente, aut qualia Pindarus
Heroum honori, Calliope fides
Pulsante, dixit, qui paterno
Pro lare pulchram adiêre mortem!
Salve dies, ô quâlibet almior
Salve die lux, pro patriâ mala
Quâ post fera exantlata, Pallas,
Principe Arausiaco chorago,
In nostra sese, concomitantibus
Phoebo et Camoenis, moenia contulit,
Interque plausus et bonorum
Laetitiam sibi struxit arcem!
Gaudete Manes, Elysiae domûs
Quodsi in recessu gaudia nostra quid
Tangunt beatos, qui perennè
Orgia agunt, vacui dolore;
Gaudete Manes DOUSIADAE patris
Et quem parentem, quem sibi praedicat
Ovans Lyceum conditorem
Sorte datum, umbra pii WILHELMI!
Fundata vestris consiliis schola,
Jactata saevo turbine perstitit,
Ut quercus, horrendis procellis
Tauri agitata jugis in alti.
Alter WILHELMUS, Leida, tibi datus,
Magnum parentem qui referat tibi.
Hoc cresce pater, et festa seri
Laeta magis celebrent nepotes!
